Nega Muhrim Ikki Xil Gapiradi?
Chop etildi Muallif: Xurshidbek (Fikrbank) Kun: 21-Fev, 2012 Bo`lim: Munosabat |
Muhrim ikki xil gapiradi. Muhrim bir kishiga “internetga kirma!”, deydi. Boshqasiga, u internetdan chiqib ketmoqchi bo‘lganida: “Balki o‘ylab ko‘rarsan?”, deydi. Muhrim shunaqa — ikki xil gapiradi.Muhrim nega ikki xil gapiradi? Bunda “internet” deyilganda nima nazarda tutilayotganini hisobga olish kerak. Bir kishi kirmoqchi bo‘lgan “internet” — Odnoklassniki. Boshqasi chiqmoqchi bo‘lgan “internet” — Feysbuk.
Muhrim nega “Odnoklassniki’ga kirma!”, deydi. Muhrim yashirmaydi — Muhrim Odnoklassniki’ni yomon ko‘radi.“Boshqalarning Odnoklassniki’siga kuniga 500talab SMS kelib, unikiga esa bir oyda ham bitta ham SMS kelmagani” uchun emas. Muhrim rus tilidagi, ruslarning qo‘li bilan tayyorlangan deyarli barcha internet xizmatlarini yomon ko‘radi (bir istisno — Yandeks’ni ruslar qilganiga ishongisi kelmaydi). Muhrim Mail.ru’ni ham, uning Agentini ham yomon ko‘radi.
Muhrim nega Odnoklassniki yoki boshqa ruscha internet xizmatlarni yomon ko‘radi? Muhrim ulardan foyda yo‘q deb hisoblaydi. Odnoklassniki yoki boshqa ruscha internet xizmatlar odamlarni Amerika yoki boshqa G‘arb mamlakatlarida ishlab chiqarilgan xizmatlardan ko‘ra tezroq va samaraliroq ahmoq qiladi, deb hisoblaydi. Kechirasizu, Muhrim Odnoklassniki’ni “internetdagi “Qatortol” deb hisoblaydi. Muhrim Odnoklassniki’ni uyatsizlik va odobsizlik maskani deb biladi. Muhrim Odnoklassniki orqali do‘stlari yangi aforizmlarni o‘rganganliklarini, ba’zi do‘stlarining “ismi” “Don Karleone”, boshqasiniki esa “Crazy cool nimadir”, uchinchisiniki esa “Ne znakomlyus” ekanligini, va yana boshqa bir qator “hayotiy muhim” ma’lumotlarni bilishi mumkin, ammo bundan ortiq nimadir bila olishiga ko‘p ham ishonmaydi.
Lirik chekinish:
2011-yilda 4,5 oyi davomida “Muloqot.Uz” ijtimoiy tarmog‘ida ishladim. Bu vaqt oralig‘ida biz Toshkentda o‘tkazilgan ICT Expo-2011 ko‘rgazmasida ishtirok etdik. Ko‘rgazma mehmonlari “Muloqot.Uz” stendida ijtimoiy tarmoqqa a’zo bo‘lishlari mumkin edi. Men o‘sha ko‘rgazma vaqtida Odnoklassniki’ga emailsiz ham a’zo bo‘lish mumkinligini bildim. “Muloqot.Uz”da ro‘yxatdan o‘tmoqchi bo‘lgan ko‘plab maktab, litsey-kollej o‘quvchilari, hatto, institut-universtitet talabalarida email yo‘q edi, ularning aksariyati: “Odnoklassniki’da emailsiz ham registratsiya qilsa bo‘ladi-ku, sizlar ham shunaqa qilib qo‘ysanglar bo‘larkan”, degan gaplarni gapirishgandi… Qiziq tomoni, “Muloqot.Uz” registratsiya vaqtida foydalanuvchidan mobil telefon raqamini so‘ragani uchun ko‘plab giklar tomonidan keskin tanqid qilingandi, vaholanki, emaili yo‘q minglab o‘zbekistonliklar shu vaqtgacha Odnoklassniki’ga o‘z telefon raqamlarini ishonib topshirib kelayotgani haqida hech kim gapirmasdi… Emailsiz, to‘g‘risi, internetdagi xizmatlardan to‘liq foydalanib bo‘lmaydi, bugun; internetdan to‘la foyda chiqarib bo‘lmaydi. Odnoklassniki esa internetda emailsiz ham yashasa bo‘ladi deb, odamlarni ahmoqlashtirmoqda. Menimcha.
Shuning uchun ham Muhrim ikki xil gapiradi.
Chunki — bir kishi ham, boshqasi ham — Muhrimning yaqinlari.